&عــــــدتــــــي لاضــــــــــــــاق صــــــــــــــــدري&

[جمال اللميع]

السلام عليكم ورحمة الله وبركاته


احبتي اعتذر عن طوووول الغياب وعسى هذا النص يشفع لي :



عدّتي لاضاق صدري ياجلال=القلم والطرس واحساس ٍ دفين
اكرب المعنى واشّده من خلال=فكرة ٍ ماهيب تطري للذهين
واوزن الابيات من دون اختلال= لين تسري لا يسار ولا يمين
اغلق القاف الذي بالصدر (آل)=بعدها اغلق عجوز القاف (اين)
ثم ادوهج للجنوب وللشمال=واقطف الجزلة من النبت الحزين
اشرح اللوعة وواجه لي سؤال=ويش قصة لوعتك ويا السنين
ثم اجاوب واتمثل في جمال =وافرد الجيمات والجم كل سين
قصتي ضرب ٍ من ضروب الخيال = جسدت واقع على كف السنين
مرت سنين وعيوني لاتزال=تذرف الدمعه على الخد المتين
خضت هالدنيا مع الدنيا سجال=وقمت اشوف اللي بقا منها بعين
كثرو الاعداء في ساحة قتال=وزود هذا (خوّن) الحظ اللعين
ماسلمت من الهوادي والنبال = لين ماحطو على دربي كمين
لو يعيش الناس في صدري مثال = كان ماظلن بنات ولا بنين
ها انا لازلت اصارع والمحال= اني اخضع طالما جنبي متين
ما اطيح الا اذا طاحت جبال = ويش لو اني تنفست الانين
الاسى والهم يعطيني مجال =اتوضا واطلب من الله يعين
والصبر لاقلت ياصبر الرجال=ويش خانت رجل دامه يستكين
انتهى قافي وعوّد ياجلال=جعل ربي يسعدك دنيا ودين

[عوض جبيب]

صح لسانك ياجمال اللميع
جزل ورب الكعبه
ولغتك غذبه وسهله للمتلقي
امل ان لاتنقطع هذه العذوبه والجزاله




ارق التحااايا

[ابو فايز]

اسلوب سلسل وفكرة جيده.

جعل ربي يسعدك دنيا ودين.

لاتحرمنا من تواصلك أخي الكريم (جمال)

[علي هلال السلطاني]

بارك الله فيك وصح لسانك


وتقبل تحياتى

[ابوريان السلطاني]

يابن الحلال مثلك ما يحتاج شفاعه

[سلطان بن عبدالله]

والصبر لاقلت ياصبر الرجال=ويش خانت رجل دامه يستكين
انتهى قافي وعوّد ياجلال=جعل ربي يسعدك دنيا ودين

الله يصبرنا ويسعدنا جميعاً

جداً رائعه القصيده
والاجمل بوحك بِها
الذي عبر عن ذات إيمانك ..


لا تحرمنا جديدك
وأتنا بمزيدك ..

لا عدمناك ياللميع ..!!