للمختلس برد وسلام وتساهيل(إلى روح طفلة جدّه)

عدت ألى قلوبكم وعذراً لأن معي هذا الحزن على أرواح أهلنا الأبرياء في جدّه الذين تاجر بأرواحهم من لم يكونوا على قدر الأمانه رغم حرص ولاة الأمر يحفظهم الله ويرعاهم على كل مامن شأنه رفعة الوطن وخير المواطن ولكن قاتل الله أهل الضمائر الميته أهل الجشع والطمع من شياطين الأنس

عويل، دمع، وصوت ذِكْر،وتراتيل=مشهد أسى ماهو بمشهد دُرامي
يا هو مسلسل رعب من غير تمثيل=واقع وفيه الموت مشهد ختامي
ياذا السما صرنا نخاف المخاييل=وجدّه بها جرحٍ من المزن دامي
وين الصبر والصبر به طافح الكيل=وين البراد وجمر الاحزان حامي
ندفن أسانا في صدور المقابيل=وندفن حبايبنا وتبقى الأسامي
والسيل ماله ذنب يالايم السيل=الذنب ذنب المرتشي والحرامي
أنذال تَنْهَبْ مِنْ وَطَنْ تَنْمِيَةْ جيل=وكبار ما يحتاج نذكر أسامي
للمختلس برد،وسلام، وتساهيل=ينهب وَ يُصْنَعْ لَهْ غِطاءٍ نظامي
ياطفلتي والصدق مجروح بالحيل=وحاله مثل حالة كسير العظامي
وطفولتك أرخص ثمن للأباطيل=ماهي بِرَمْيَةْ طيش من غير رامي
ملّت مسامعنا من القال والقيل =وإعلامنا لاهل المناصب مُحامي
والسالفه ماهي بحاجه لتفصيل=الوضع طينه والضمير إنهزامي
أهل الأمانه تنوصف بالمهابيل=ولاّ الحرامي في بلدنا عصامي
ومادام صبح العدل يفتك به الليل= الحقّ يبقى الحقّ جايع وظامي
ومادام غاب العدل في حضرة الميل=نامي لساعة بعث الارواح نامي
ياطفلتي نامي وخلّي لنا الويل=وأنا بشيّد عند قبرك خيامي
ياطفلتي مهما شربت الغرابيل=بقولها وادفع نتيجة كلامي
التنميه ياطفلتي كذبة أبريل=يعني مُرَكّبْها مُرَكّبْ هُلاَمي

[/QUOTE]
،،،،،،،،،،،،،،،،،،،،،،،،،،،،،،