على ذِيك الدروب

على ذِيك الدروب اللّي / مِشت خطواتنا فيها
سرت أحلامنا عجلى وحلّت دونها حسـرات

تلاشت ضحكة أحبابي / وجوٍّ كـان محييهـا
توطّن بالحشا فرقا / وزادت بالصدر طعنـات

طلبت { إحساس جمّعنا } يـرد أيـام نبكيهـا
يرجّعنا لذاك النور / ونزرع بالفرح ضحكـات

رجيت عْهود يالغالـي حسبـت إنّـا نوفّيهـا
حسبتك ما تقاطعني وتتركني بـدون صْفـات

علامك ما ترد الصوت ..! وأشواقك تخبيّها..!!
علامك ما تجاوبني وتقتلنـي جفـا وسْكـات

حبيبي كان تسمعنـي تـرى أيامـي مجافيهـا
بعد ما غابت علومك هناها والأمـل بالـذات

وتخنقني حروفي صمت عجز بوحـي يهدّيهـا
وتغزيني سهامك لين / أجرّ بداخلـي آهـات

تنطقني دموعي بوح عجـز صمتـي يداريهـا
وتفضحني براءة عين ملاها وقتهـا بدمعـات

أنا من غابت طيوفـك / وأحزانـي أناجيهـا
أنا من زارني بُعدك كتبتـك بالحنيـن أبيـات

أنا فـي حبنـا طفلـه / وأشواقـك تناغيهـا
وصالك بسْ يرضيني / وقُربك أطيب الحّـزات

تعال ونوّر أوقاتـي / تعـال وعلّتـي إشْفيهـا
تعال وداو لي جـرحٍ يزيـد بْغيبتـك ونّـات

وربّي لو تبي عينـي فـداك العيـن وراعيهـا
لإنّك داخلي موطن وشوفك يبـري العـلّات

فداك الكون وأيامي فـداك الـروح وإنهيهـا
مدامي ميّته بيدك { تراها أسعـد اللحظـات }