** دقــــامة الـــعايــــــل **

ليا ذكرت إني من روس السلاطين *** ماعاد أدور للمخاســير ســبـه

مانـيب من يسهر على ليل ياعين *** أسـهر على جمرة غـضى وسط شـبه

ولا نيب من يشره على هرجة الشين *** أشره على اللي يملك القلب حـــبه

وأشوم عن قولة شـاعر نـساوين **** وأتعـب على الجزلات وأترك مـطبه

وأهـيم في ماضي ربعي المسمين **** أهل البيوت النايفات الــــمــشبه

دقـامة العايل لاعجت ميادين *** اللي يذبون الراس من فوق غبــه

رجالهم واحد لكن بخـمسين **** ماسمحت سود الأيــام دربــه

عدونا نسقــيه سموم الثعابين *** وحليفنا ياخذ على الراس حــبه

مرباعنا قاع(ن) شـرات البساتين *** يلعبها الكدري لياهبهب مــهبه

ومضيافنا ملفى رجال(ن) حشيمين *** يلقابه الطرقي من الكيف شــربه

فــنجال طيني ماهو من الصين *** يطربك صبابه ويطربك صــبه

وختامها صلوا على النبي الأمين *** على الرسول اللي فضله ربـــه


وســـلامتكم للــشــاعر / فواز الحبيل