أمشي وتمشي غرابيل الليالي معاي

قبل كل شيء كل عام وأنتم بألف خير وعيد سعيد وعمر مديد للجميع بإذن الله تعالى وكم أشعر بالخجل للغياب ولكن يشهد الله أنه غياب إجباري لأكثر من سبب والذي أعرفه تمام المعرفه هو أنكم لاتغيبون من القلب والذاكره وإسمحوا لي أن أهديكم بعضاً من قطرات شعري المتواضع الذي يسموا بكم ويرتقي بذائقتكم ليلامس الغيم

إلى زِمَى الشوق في صدري وفاض الحنين=سيّرت لك خطوة اقدامي بِصحرا ظماي
في سكّةٍ موحشه مـا مرّهــــا العابريـن=وَلاَ نِبَتْ في ثـراهـا غير شوكـة عنـاي
أسير فيها وانــا اجهل موضع خُطاي وين=وامشي وتمشـي غرابيـل الليالي معاي
أروح وارجع من المشوار(صفر اليدين)=لاَ الما لِقِيْتـه:وَلاَ حَصّلْت طفلـة غلاي
هــذي هي الحال بَعْدِكْ ياجروح السنين=كنّي عمى في غيا بـك وانكرتني عصاي
كِرِهْت ممشى الْقِدَم في سكة التايهين=وتِعِبْت أعلّق على حبـل الأماني رجـاي
وإنتي سبب كل ضيق وكل جرحٍ دفين=تَرَكْتِي الجرح في روحي وَاخَذْتي دُواي
غِبْتِيْ:وَلاَ يَومْ فَكّرْتِي عَلَيْ تسألين=حتى اصبح الهاجس فـراشي وحزني غَطَاي
يا للي رميتي على جسم الغلا جمرتين=وِحْدَه بِكَفّي والاخرى حَدّرّت في حَشَاي
مِنْ كُثْر حزني عليك:أبكيت من غير:عين=الأرض ولاّ المِزِن دمعه هَطَل من سماي
ما قول غير الله يــردّك عليّ وتجين=وإن مَا لَحَقْتِي عَلَيّــه حَيّ:خوذي عزاي
ولَـوّ الأما ني تحقّق قلت ليت الجبين=يكـون قبري مثل ما كـان سِبَـة بلاي
حبيبتي في ختام الهرج لي حاجتين=لا تِنْكِــرِيْني:وَلاَ تنسى غصـونك هواي
ولاّ فُرَاقِك شِقَى عُمْر وعسى الله يعين=بَطَـوّل اشرب مراراته بكاسة شقاي