تصيح تقول يا(حرمه)،تحسب إنك تعايرني

تصيح تقول يا(حرمه)،تحسب إنك تعايرني!! .... شنبك اللي تفاخربه..ترى اللي جابته حرمـه

تصدق كذبتك دايم ،، مبادئ حيل تقهرنـي .... (نقص عقلك مع دينك)،،ترى مليت هالكلمه

ياجاهل فتح عيونك..ياويلك لو تصاغرنـي .... غضب،،تهديد،،وإستلمّه..وسمّه اللي تبي سمّه

أنا مليت من ظلمك يا(آدم) وش تصورني!! .... أذا إني ناقصه بعينك،،وداعي منتهي الحكمه

تراني ساكته بكيفي ،، نصيحـه لاتفجرنـي .... غضب شيطان ماميز ،،مابين الخال والعمه

عيوبي طيبتي وقلبي..حنان وشوق يجبرنـي .... علي عكسك تجي قاسي وكلن راضي بسلمه

حسافه وقتي الفايت،،تذكّـر يـوم تِسهِرنـي .... علي قولة انا عاشق وحبك صابنـي سهمّـه

تذكّر يوم لي تركض ،، تقول يازين آمرني .... علي سنة رسول الله أشيل الحمـل وآزمّـه

فرحت وقلت هذا اللي أبي في ظلّه يسترنـي .... اذا ضاقت بي الدنيا،، مسح دمعاتـي بكمـه

ابي انسى به الدنيا وابي بالحـب يشعرنـي .... ابيه يكون لي فرحـه اذا زاد الزمـن همـه

لكن للأسف غلطه وهـم كـذاب ساورنـي .... جزاتي والثمن عمري..وقتلت بخافقي حلمـه