ياسادة............... اشعر بالغثيان عندما ارى صاحبها

انها عدوي اللدود ..........انها الفوضى .
وتعريفها :الفوضى في اللغة تطلق على معنيين هما:


1-اختلاط لأمور بعضها ببعض ,يقال: نعام فوضى أي مختلط بعضه ببعض,ويقال :اموالهم فوضى بينهم ,أي هم شركاء فيها.

2- والتساوي في الأمر او الرتبة, يقال: قوم فوضى أي متساوون لا رئيس لهم...

*ويطلق على الفوضى "الضوضا" جاء في لسان العرب عن ابي زيد قوله :
القوم في ضوضا امرهم وفي ضوضا فيما بينهم اذا كانو مختلطين فيلبس هذا ثوب هذا, ويأكل هذا طعام هذا....
بعد مابديت كلامي بشكل لغوي رح اتكلم بالعامية
فيه ناس الله لايبلى مسلم تمشي الفوضى في عروق عروقه يحب يشوف كل ماقدامه مكركب .
نشوف غرفته مثلا الشماغ في ديرة والعقال في اقصى اقصى الغرفة .ولا دولاب الملابس مفتوح او مكسور وفيه من الفوضى مايفي لبلد .
طيب تعالوا نشوف لو يبي له حاجه في الغرفة لازم ينكب عفش الغرفة على شان يلقاه ......طيب يالحبيب اعرف وين تحط اغراضك اول شي والله يقهر .



نطلع من الغرفة للصالة هناك في اخرها .........مفاتيح السياره مرميه رماها قبل مايدخل الغرفة ولو سألته عنهم مايدري وعلى طول رح ينكب عفش الغرفة المسكينة .
اصبرو علي شوي رح نمر عل المجلس ........لا عاد المجلس حكاية ثانية لما تخش اول ماتخثع بطفاية مليانة ملي قطوف او تشوف علب البيبسي تجميع يومين اوثلاثة .
تبون تقولو ن ليش مانظفو اهل البيت انا اقولكم لسببين الاول تعبوا وهم يكنسون ورى هالفوضوي والثاني يخصه هو نفسة وهذه والله موجود في كثير من البشر يحب العفسة ويتعايش معها ويرتاح لما تكون يمينه ويساره .
من المجلس نخرج الى الشارع وبنشوف سيارته من الداخل ..ثوب او اثنين تحت المرتبة لاتستغرب لو لقيت بوكه في اي زاوية من السيارة (يدوره من يومين ) المشكلة مو هامه عادي (انا ماجبت طاري البوك في غرفة النوم ليش (لاني ادري انه يدوره من هليام ) حلوة هليام .
طيب نبي نفتح الدبه ياشباب بس خلوكم ريلاكس ونشوف دبة سيارة خوينا ابو الفوضى كلها .
ملابس داخلية لها 5 ايام كان يبي يوديها المغسلة (لها 5 ايام ياظالم ) ترمس شاي له يومين كفر مبنشر من شهر طبعا الفوضوية تنسحب على المكان والزمان وتلاقيها بموعيد .
نشوف مواعيد الاخ فوضى بن عارمة .
كلنا نعرف توقيت غرنتش +3 خوينا هذا وهذا طبع فيه مايتركة هو لحاله +13 على الموعد اللي قاله لك ويمكن مايجي .
خوينا عنده رحلة تلقاه قبلها بنصف ساعة يقلب عفش امها (طبعا الغرفة) الشنطة وينهي والملابس وينهن والاوراق مدري وين قالعهن (هو علمه بهن يوم يحطهن بس وين الله اعلم ) يركب السيارة وهو مشتط يشغل ويدعس .....اوووووف التذاكر رجعلهن مالقاهن بالغرفة حاس البيت اخيرا لقاهن ورا كنب المجلس ايش اللي جابهن الله اعلم المهم اخذهن وشلع خوينا للمطار وشوفوا( من لايجيد ادارة الوقت ) الان بيحرج نفسه مع الموظفين بالمطار ورجاوي وحب خشوم ( ياخي جهز امورك قبل الرحلة بساعتين واطلع المطار وريح وتقهو وخلك مرتب . طبعا هو يعرف انه هذا الصح بس مايقدر لان اللي فيه مرض صعب التخلص منه .
طيب خوينا سير على واحد من الشباب اول مادخل انواع الهياط ومسك الشماغ والعقال وقطهن فوق وين مايطبن يطبن وبدت الفوضى تنسج خيوطها في مجلس هالضعيف خويه .. انت يامعزب القر وين الورقة نبي كم داس طبعا خوينا لسا ماجلس راح لاحد الدروج يدور الورقه طلع كل مافيه مالقى شي ترك كل اللي طلعه متناثر (ياسلام عاد هذا الجو اللي يحبه الكراكيب والفوضى العارمه .
ماعلينا جلس الرجال وجاه اتصال وقال ياشباب شو وبرجع وهوطالع ركزو معي بهذي وهم يعشقونها حتى الثمالة يلبس تكرمون (اي نعول يلقاها قدامه ) ماعليه راعيهن يبي يمشي يبي يروح الله لايهينه ينتظر . خوينا يغيب ساعة ساعتين (عنده هو لامشلة ) كلمه صاحب النعول (رده ياخي اشبك جننتنا ترى كلهن نعول ) ياخوي ندري انهن نعول ..............وكانك انتعلتهن بشكل مؤقت .. اللي نعرفه انك تنتعل الفوضى بشل دائم .
طبعا هذه الفوضى تنسحب على كل شي في حياته وليتها على حياته بس الا مايسلم منه من يحتك معه .
بعض الصور السريعة :
يلبس اي ثوب يلقاه قدامه بالبيت . (طبعا اذا كان فيه تناسب بالمقاس مع اخوه او ابوه )
ينام في اي مكان في البيت .
يطفي زقارته باي مكان بالبيت .
المهم اي فوضى عارمة معناها ان الاخ مر من هنا . والله يخارجنا من هالنوعيات .