ويصير في فرقا الرفاقه سبايب

بسم الله الرحمن الرحيم

اهدي اليكم احبتي هذه الابيات التي اعجبتني كثيراً لاحتوائها
(الحكمه والنصيحه ) فهي فعلا خبرة حياه واول مشاركه لي
من حوطة سدير وهي للشاعر (خالد الخرفاني)


البـــــــرق لعيون المولع مناديب
والبيد لقــــــــدام الخلاوي ركايب


وارواحنا لهموم بقـــــــــعا معازيب
ومعزب الارواح قبـــــر ونصايب


سبحان من يخفي عن العـــالم الغيب
وخلا الوعد من نازع الروح غايب


كلً يسوق الرجل ويروح ويـــــجيب
احدً يجيب بسلم واحدً نــــــــــــهايب


واحدً يجيب الفود والعـــــز والطيب
واحدً بذله كل ماكان جــــــــــــايب


من لا ستر وجهه عن الــذل والعيب
ماعاد يلقى لذل وجهه طبــــــــايب


من لا حمى وجهه قبل طلعت الشيب
محدٍ يعوضه وجه لاصار شــــــايب


ولاصارذكرك فوق روس المــراقيب
خلك على دربك ترى الدرب صايب


تصير بعيون النشاما كما الـــــــذيب
وبعيون عدوانك عطيب الظـــــرايب


موت الفتى بالمرهفات المحــــــاديب
اخير من حي(ن) مع الناس خـــايب


موتً تباكاله عيون الاجــــــــــــانيب
ولاعيشةٍ تدعي عليها القــــــــرايب


ولي نفوسٍ ماتروم المـــــــــــواهيب
ولي يدين(ن) ما تســــــــــد النوايب


عذر الردي ماكل من يجهد يـــصيب
عودالحماطه كاسرته الهبـــــــــــايب


مايخلف الهقوه طوال الاشـــــــــانيب
صحيح من قال المراجل وهـــــــايب


يربى على الشاهوق عكف المخاليب
والا الوطى يرباه بـــــــوم الخرايب


من راقب العالم يشوف التعـــــاجيب
ومن طاول الدنيا يشوف الغـــرايب


غير النبي محدً بليــــــــــــا عذاريب
وكل على الثاني سيوله جـــــــذايب


ماكامل الا وجه جـــــــزل التواهيب
ولا رابح الا اللي من الـــــذنب تائب


كلٍ ذنوبه تغرق الكم والـــــــــــجيب
وكلٍ عليه من الليالي مصــــــــايب


ليه الحسد والغل والشك والــــــريب
وليه القطيعه واندلاع الحـــــــرايب


يولد الاحقاد شذب العــــــــــــراقيب
والحقد ســـــــــــــمٍ فالمعاليق ذايب!


شرارةٍ من ملحقين المشـــــــــــاهيب
من ناشته خلت ظلوعه حطــــــايب


يومون بالامواس مثل القصــــاصيب
ذنب(ن) يوقف منه قطر السحـــايب


لعل من يفرح بشيل المشــــــــــاعيب
ويصير في فرقا الرفاقه سبــــــــايب


تقطع عراويه من الرزق والصــــيب
ويموت ماتنظر عيونه حبــــــــــايب


وتصفى النفوس ويركـــدن المشاريب
لابه ذنب عقرب ولابه نشـــــــــايب


هذا بعض ماعلمتنا التجـــــــــــاريب
واللي من الايام جتني جــــــــــلايب


لاكامل الاوجه من يعلــــــــــم الغيب
ولارابح الا اللي من الــــــذنب تائب


(( خالد الخرفاني))