شبة النار

يا محلا الجمعة الى شبـت النـار=في سهلةٍ والهم مـا لـه طـواري
يازين شبه من عقب هل الامطـار=رمثٍ وقـوده نشعلـه بالبـراري
اليا غدى بين الحطب يسعر اسعار=واهج سناها بالخـلا احتـراري
مع دلةٍ صفرا بهـا البـن و بهـار=كيف الرجال اهل الكرم والفخاري
نزيدها ما بين هيـلٍ و مسمـار=محموسةٍ شقـرا وبنـه هـراري
نصبها قندٍ مـن الكيـف ينـدار=في مجلسٍ فيـه الخـلاوي يمـاري
وسوالفٍ فيها من المجـد تذكـار=كلن بفعلـه للنواميـس شـاري
في وسط روضٍ امتلى نفل وأزهار=وعشب اعتلا بين الحجل والحباري
والوضح ترعى بين شعلٍ وابكـار=وراعٍ لها في كل منـدى يبـاري
عز الله انها جلسةٍ تفـرح انظـار=وتجلي همومٍ من زحـام الديـاري
وصلاة ربي عد ما تورق اشجـار=على النبي واعداد رمل الصحـاري