بعد القلوب اشد من بعد الاجسام

بعد القلوب اشد من بعد الاجسام
مادام غصن الود طارت رفوفه

كم شخص نشوفه من العام لعام
اقرب من إللي كل يوم نشوفه

الادمي تقوده ضروف واحكام
وماكل واحد يخدمنه ظروفة

نطرد ورى سرب الاماني واحلام
ويالله عسى بعض الامور مخلوفه

لو يكشف الواحد صناديق الايام
ماكان خضب بالاماني كفوفه

العمر يمشي والتجارب لها حزام
والشيب يضرب لنواصي دفوفه

كم واحد غافل وهو يلبس (حرام )
مايدري ان احرامه لموته (بروفه)

طول الامل كفه تلوح لقدام
والنفس لمعانق هواها شغوفه

والضيق يتسلل على روس الاقدام
لاحساس من شعره على اسوار جوفه

ياصدري اصبر وانت في بهوك اقسام
من المواجع غير نفسك عيوفه

لاتنحني لو كانت عروقك حيام
وعذوق (لينة) مابذرت مخروفه

ضيوف قلبي (تغرف) عدوده آلآم
وعلى الزمن ياكبر شرهة ضيوفه

مابين قام الحض والحض ماقام
الحزن رتب بالحنايا صفوفه

يحطبني (بفاسه)ويتركني حطام
باسباب معروفه وغير معروفه

وانا ماغير اهيم واتشجر هيام
واثمر قصيد يانعات حروفة

صح لسان شاعرها

صح لسانك منسدح