الجيب والقرناس

الجيب والقرناس وخوة هل الطيب
تسوى مجالست الحضر فالمدينـه

ماسبّهم واعرف انا مابهم عيـب
بس الهوى ياهل الهوى حد لينـه

عزبه وخيمه والصحاري مضاريب
والتيس من قبل الضحى صالخينه

ومعلقينه من كراعه على الجيـب
والبن الاشقـر تونـا حامسينـه

شبّت حطب ماهي بشبة عياسيـب
ارطـا وعرفـج يمنّـا حاطبينـه

واليا سنت شب الجروم اللواهيب
قام المقهوي قّرب المـاء بدينـه

ركّـب دلال مجلـدات المقاظيـب
بغداد من سوق الحفـر جالبينـه

بيضن تلالا يطعمـن المشاريـب
تبعد عن انفوس العبـاد الغبينـه

واليا احتمى ماهن يشيل المراكيب
يحـط كيفـن بالنجـر طاحنينـه

فنجال ونص وردهن يمـه قريـب
وجاب البريج وسكره في بطينـه

وحطه على صفه هذيك المهاذيـب
والبن فاح وركـده فـي سكينـه

وجاب الدلال الي يعرف المواجيب
ثنتين غير الـي بهـن عاملينـه

مجنون كيف ورتب الامر ترتيـب
حط البهاروريـح هيلـه يازينـه

ثم زلهن لين استوى باخر السيب
وحطـه بنـاره ربنـا لاتهيـنـه

وقال اقدعوا تمر حلو توّه امجيب
اخلاص من دار الحسا محظرينـه

ثم صب فنجاله ومابـه عذاريـب
والله على الفنجال تسلـم يمينـه

مجربن ماهوب يحتـاج تجريـب
اي والله انـا كلـنـا مجربيـنـه

مافيه ظيف وكل ابونـا معازيـب
والشاي خدر والـورق حاكرينـه

وعقب السوالف والقهاوي مطاليب
كـل يناظـر للمـواتـر بعيـنـه

نبي نهيّف فوق روس المراقيـب
وانفّرع القرناس لاجـل السمينـه

اليا خطفهـا خطفتـن بالمخاليـب
تبري النفوس الضيقات الحزينـه

واليا انتهى المقناص جبنا مكاسيب
والحر الاشقر عقبهـا مبرقعينـه

ونمشي ونلقا يمّنـا فطـر شيـب
ومفرود يطرد من ورى امه تنينه

وسط النفود ولانمـر الشخانيـب
نخاف من ظرب الحصى فالمكينـه

ووساع صدر ونطقنا بالتراحيـب
واعقولنا هـي العقـول الرزينـه

ياليت لي دورن بغوج الاطانيـب
وانسى حضارات الخراب وسنينه

اخير من طرد البنـات الرعابيـب
واحدن تسمّع من عذابـه ونينـه

ممشاي صح وخوتـي للاشانيـب
رجل يصد اعن المراجل ياشينـه





الشاعر ------عبدالكريم الجباري

صح لسانه ويعطيك الله العافية على هذا النقل الأكثر من رائع


ولك جزيل الشكر والتقدير

صح السانه ويعطيك العافيه يالضاري

يعطيك العافية قصيدة فى قمة الروعة

وياحبى للجبارى لانة شاعر متمكن وشخص متواضع

صحت ابدانكم

والله يعطيكم العافيه على مرورك


ولا هنتوا جميعاً

اختيار رائع يالضاري
ولا تحرمنا من هذه الذائقه
الراقيه

المشاركة الأصلية كتبت بواسطة الضاري

الجيب والقرناس وخوة هل الطيب
تسوى مجالست الحضر فالمدينـه

ماسبّهم واعرف انا مابهم عيـب
بس الهوى ياهل الهوى حد لينـه

قصيدة جميلة معبرة كأنها لوحة رسام , تعطي القارئ والمستمع جو خاص من المتعة والروعة والانتعاش .
ولكن
الأخ لايريد تخصيص الحضر عن البدو فهم مجتمع واحد , ولكن الذي فهمت أنه يقصد بالحضر سكان المدينة سواء حاضرة أو بادية , وهو يفضل الخروج إلى البراري وترك حياة المدن التي تكثر فيها الهموم والمشاغل التي لا تنتهي .
ولذلك أحببت أن أوضح هذه النقطة بالنيابة حتى لا تفهم خطأ .
وشكرا على هذا الانتقاء الرائع .

وبالمناسبة أحب أن أسوق هذه الأبيات في القهوة العربية لأنها تناسب المقام , لو أن الأطباء ما ينصحون بالقهوة مع الهيل والزعفران والمسمار لأنها تثير القالون العصبي ولكن ما نطيعهم نشربها ما دام فينا حياة .

إلى عن لي تذكار الأحباب وأشتـاق*****بالي وطاف بخاطري طاري الشـوق

دنيت لك مـن غالـي البـن مـالاق********بالكف ناقيها عـن العـذف منسـوق

أحمس ثلاث يانديمـي علـى سـاق*****ريحه على جمرالغضا يفضح السوق

وأيـاك والنيـة وبالـك والأحـراق********وأصحا تصير بحمسة البن مطفـوق

الى أصفر لونه ثـم بشـت بالعـراق******وغدت كما الياقوت يطرب لها الموق

وعطت بريـح فاخـر فاضـح فـاق********ريحه كما العنبر بالأنفـاس منشـوق

حياك الله الضاري انت والجباري
وصح لسانك والسان الجباري
اسمح لي اسجل
اعجابي بهذا الرجل قبل ان يكون
شاعر متمكن .
ارق التحايا

مشكور اخوي الضاري
انا من اشد المعجبين بالجباري
وعلى فكره موجود شله بصوت الجباري لنفس القصيده ورررررررررررروعه الشله
ولكم كل الود والاحترام

بدر

لاهنت علي المرور