والمطوع لو يشوف خديـد سـاره

للشاعر ــ محمد ابن فهاد القحطاني المعروف بــ ابن حصيص

هيّض ابن حصيص في تالي نهاره=ألف قاف ٍ في ضميـره مدلجاتـي
ياوجودي وجــد مكسـور الجبـاره=آخـذ ٍ تسعيـن ليـلـه مايبـاتـي
أو وجود اللي خذا الحاكـم ديـاره=خـذ حلالـه والحريـم مسلّباتـي
عقب ماهو تاجر وراعـي أمـاره=صـار فـلاح ٍ وامـوره هيناتـي
أرتحل يـا فهيـد منبـوز الفقـاره=آركـي وحبـال كـوره كالفاتـي
آركي ومربّـع ٍ عشـب القـراره=ما علاه الشد من عشـر سنواتـي
ديرة ٍ ( ...* ) ما فيهـا صقـاره=غيـر شيبـان وعجـز محندباتـي
من خشوم ( ..*.) لي حد الزباره=جعل تمحـل والوشـوم مربعاتـي
صاحبـي بالوقـف مدهالـه وداره=ما سكن فـي ( ... *)والاّ (..*.)
ولعتني بالهـوى والزيـن سـاره=دلهتنـي عـن غناديـر البنـاتـي
يا حسايف بنت ذاك الجار سـاره=عند ابوها تـدّرجْ مثـل المهاتـي
ريق ساره مثل سكر في غضـاره=أو حليب ابكار عـرب مسمناتـي
والنهيد زبيدي ٍ فـي دعـب قـاره=في محير الماء القراح مصلّعاتـي
والثنايـا قحويـان فـي زبــاره=زاهي ٍ نبتـه علـى كـل النباتـي
راس ساره ذيل شقراً وسط غـاره=والجدايـل بالرشـوش مجدلاتـي
والمطوع لو يشوف خديـد سـاره=طبّق المصحف وعجّل بالصلاتـي
ما ذكر جار ٍ ذبح بالحـب جـــــاره=بالمبيسـم والثنـايـا المرهفـاتـي
حالف ما نسى ولا اسلى حب ساره=كود اهل شقرا يخلـون الصلاتـي
لايمي فاله حنيـش ٍ فـي مغـاره=سمّها يشظى العظـام الصالباتـي

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

* مابين الأقواس أسماء مدن لم أرغب في ذكرها.